تنبية هاام : احذروا من هذة الماركة .. الماركة تعنى " كافر" ,,,

السلام عليكم ورحمة الله وبركاتة ,,,,

-ابدأ كلامى اولا بالدعاء ليكم وربنا يارب يتقبل اللهم امين ... ربنا يارب يكرمكم بالخير ويبعد عنكم كل سوء ويتقبل منكم ومنا والمسلمين صالح الاعمال اللهم امين ...."واسال الله لكم رزق مريم وقصر اسيا وتقوي عائشة وقلب خديجه ورفقه فاطمة" اللهم امين والمسلمين اجمعين .

- وتانى حاجة بقول لمدونتى مرت سنة على انشائك بفضل الله وكرمة وانا سعيد بالمدونة دى علشان هى فتحة خير علية الحمد الله رب العالمين وبتمنى من الله انها تكون اضافت ليكم ولو معلومة صغيرة لاحبائى فى الله واصدقائى المتابعين ليها ... وكفاية انها خلتنى اتواصل بمسلمين متفتحين زيكوا وبارك الله فيكم وربنا يتقبل منا ومنكم والمسلمين صالح الاعمال .

- والنقطة الاخيرة قبل ماندخل فى الموضوع الخطير بتاع النهاردة بقول ليكم جميعا ربنا يباركلكم يارب فى صحتكم وعافيتكم وخيركم اللهم امين والمسلمين ... واحب اشكركم اسوة بالحبيب المصطفى ومعلم البشرية جمعاء سيدنا محمد صلى الله علية وسلم فى هذا الحديث الجميل :-عن أبي هريرة رضي الله عنه مرفوعا { لا يشكر الله من لا يشكرالناس } إسناد صحيح رواه أحمد وأبو داود والترمذي .... ودة علشان تفاعلكم مع حملتنا الجميلة " لا لتهويد المقدسات الاسلامية " وان شاء الله تعالى مستمرين فيها علشان عمرنا ماهننسى مقدساتنا الاسلامية وبأذن الله ربنا هينصرنا على اعداء الدين مهما بعد الزمان اوقصر فأن شاء الله النصر للاسلام والمسلمين بأذن الله تعالى اما اجلا او عاجلا ..

- مـــــــــــــــ وضوع اليوم :- " تنبية هاام : احذروا من هذة الماركة .. الماركة فيها سما كافر" ,,,
- الموضوع جدااا خطير ياجماعة وهو عن ماركة منتشرة بالاسواق العربية والاسلامية وتخيلوا لما يكون على تيشيرتك او كابك او مجك اوعربيتك او اى حاجة بتستعملها كلمة " infidel" وتعرفوا معنى الكلمة دى اية ياجماعة لو حد عندة قاموس او يروح يترجمها على صفحة جوجل هتلاقى معناها " كافر او ملحد او كفرى " ياجماعة حاجة فعلا فظيعة والماركة منتشرة بس دة برضوا مش موضوعنا اننا نتكلم عن ماركة بعينها او حاجة محددة ولكن موضوعنا اننا نتحرى الدقة شوية ياجماعة فى اختيار الحاجة الى تناسبنا فى ملبسنا ومأكلنا ومشربنا وفى كل حاجة فى حياتنا ... وفاكرين لما اتكلمنا عن الحجاب فى موضوع سابق وكان عنوانة "صححى حجابك تسعدى بحياتك " ودة كان للنساء المسلمات وقصدنا بالموضوع دة برضوا الملبس وتصحيح الحجاب ... برضوا فى الموضوع دة عاوزين نقصد شريحة الرجال او شباب المسلمين ... يعنى مش معقول مااااشى فى الشارع ولابس كلمة "كافر " او اى عبارة مسيئة او راسمة خادشة للحياء وانت بتدخل مسجد او بتمشى فى الشارع او فى اى حتة ... فياريت نراعى ياجماعة النقطة دى ربنا يكرمكوا ويكرمنا جميعا سويا اللهم امين .. يعنى مثلا ياشباب كنت فى مسجد من يومين وكان فية واحد قدامى بيصلى لابس تيشيرت علية راسمة خادشة جدااا للحياء وتخيل انت مكانة وربنا بيشوفك فى الوضع دة وانت فى بيت الله وهسأل سؤال يعنى لو انت رحت فى مقابلة شخصية مثلا لشركة كبيرة " طبعا لله المثل الاعلى " ياترى هتروح لابس التيشيرت دة ولا هتكون لابس بدلة وكرفتة وفى كامل هيئتك علشان المدير يوافق على تعيينك ياريت نفكر فى النقطة دى كويس ياجماعة ونكون دايما بنراعى ربنا فى كل تصرفاتنا واقولنا وملبسنا وكل حاجة وربنا يتقبل منكم ان شاء الله ويثبتكم على طاعة الله وحسن عبادتة .

- وأسوة برسولنا العظيم صلى الله علية وسلم وهدية عند لبس الجديد "كان صلى الله عليه وسلم إذا استجد ثوبا سماه باسمه عمامة أو قميصا أو رداء ثم يقول اللهم لك الحمد أنت كسوتنيه أسألك خيره وخير ما صنع له وأعوذ بك من شره وشر ما صنع له الراوي: - المحدث: ابن القيم - المصدر: زاد المعاد - الصفحة أو الرقم: 2/345خلاصة حكم المحدث: صحيح "

-هطرح سؤال وهنجاوب علية مع بعض ان شاء الله ياترى اية مواصفات ملبس الرجل ؟؟؟؟

فاللباس الشرعي بالنسبة للرجل يشترط فيه:

1- أن يكون ساتراً ما بين السرة والركبة

2- أن لا يكون شفافاً بحيث تبدو بشرة العورة تحته بدون تأمل

3- أن لا يكون ضيقاً بحيث يصف أعضاء العورة

4- أن لا يكون فيه تشبه بالنساء.

5- أن لا يكون فيه تشبه بالكفار.

- شفتوا ياجماعة النقط المهمة دى ياريت نتبعهاااا فى اختيار الملبس ونركز عليها جدا فى اختيارتنا بعد كدة بأذن الله تعالى ... وصدعتكوا معلش بس الموضوع جداا خطير فقولت لازم التنبية وربنا يجزيكوا خير على قرائتكوا للموضوع .

اللهم قد بلغت اللهم فاشهد .....